08, 09 avqust 2024-cü il tarixlərində Gədəbəy Rayon İcra Hakimiyyətinin, Qazax-Tovuz Regional Mədəniyyət İdarəsinin Gədəbəy rayon Mədəniyyət müəssisələrinin, Gənclərin İnkişaf və Karyera Mərkəzinin Qazax-Tovuz regional nümayəndəliyinin Gədəbəy bölməsinin, Mədəniyyət İşçiləri Həmkarlar İttifaqı Gədəbəy rayon Komitəsinin birgə təşkilatçılığı ilə rayon gəncləri və gələn qonaqlar üçün "Yaşıl həyat - Bir yay əyləncəsi" adlı festival təşkil olunub.

Festivalda Gədəbəy Tarix-Diyarşünaslıq muzeyi tarixi eksponatlardan, Gədəbəy rayon Mərkəzləşdirilmiş Kitabxana Sistemi isə kitablardan ibarət sərgilər təşkil ediblər. Rəsm sərgisində isə istedadlı gənclərin əl işləri nümayiş olunub. Rayon gənclərinin festival ərzində çəkdikləri müxtəlif rəsmlər isə münsiflər heyəti tərəfindən dəyərləndirilib.

Açıq havada baş tutan tədbirdə gənclər saz, qarmon, tar və nağara kimi alətlərdə öz bacarıqlarını nümayiş etdiriblər.

Həmçinin gənclər üçün əyləncəli oyunlar, intellektual viktorinalar, animasiya filmlərinin nümayişi təşkil olunub. Stolüstü tennis, bilyard idman növlərində iştirakçılar arasında yarışlar keçirilib.

Festivalın ilk gününün sonunda müxtəlif yarışlarda fərqlənən qaliblər fəxri fərman və hədiyyələrlə təltif olunub, bütün iştirakçılara isə sertifikatlar verilib.