Azərbaycan İnterneyşnl Mayninq Kompani Limited Şirkətinin maliyyə dəstəyi, Qazax-Tovuz Regional Mədəniyyət İdarəsi Gədəbəy Heydər Əliyəv Mərkəzinin və Gənclərin İnkişaf və Karyera Mərkəzinin Qazax-Tovuz regional nümayəndəliyinin Gədəbəy bölməsinin birgə təşkilatçılığı ilə Gədəbəy gəncləri üçün "Gənclər yaşıl dünya naminə" layihəsi çərçivəsində "Gənclər iqlim dəyişmələrinə qarşı" təlimi təşkil olunub.

Təlim Gənclərin Ətraf Mühit Avropa Şəbəkəsinin ("YEE Network") “Sustainaware” Gənclərin Texniki Məsləhət Şurasının üzvü, "Goranboy Gənclər Evi"nin əməkdaşı, təlimçi Elnur Arifzadə tərəfindən həyata keçirilib. 

Gənclər ilk olaraq "Tullantıların idarə olunması: 5R qaydası" ilə tanış olublar. Daha sonra "Wedding Cake modeli" ilə Dayanıqlı İnkişaf Məqsədləri izah olunub. Karbon ayaq izi və parnik effektinin təsirlərini azaltmaq üçün hansı addımlar atılmalı olduğunu öyrəniblər. COP29 məlumat sessiyasında isə qlobal səviyyədə iqlim dəyişikliklərinə dair müzakirələr aparılıb.

Təlim sessiyalarından əldə edilən bilikləri sınaqdan keçirmək üçün əyləncəli və maarifləndirici "Eko Kahoot" yarışması keçirilib. Yekunda təlimi uğurla başa vuran gənclər sertifikatla təltif olunublar.