01 Mart 2024-cü il tarixdə Qazax rayon Mədəniyyət Mərkəzində Qazax rayon İcra Hakimiyyətinin və mədəniyyət müəssisələrinin birgə təşkilatçılığı ilə 1 Mart- Ümumdünya Mülki Müdafiə gününə həsr edilmiş " Mülki Müdafiə sahəsində innovativ texnologiyalar " mövzusunda tədbir təşkil edilib. 

Tədbirdə Qazax rayon İcra Hakimiyyəti başçısı aparatında Sosial -iqtisadi inkişafın təhlili və proqnozlaşdırılması şöbəsinin müdir müavini Azad Hümbətov, Qazax rayon DYM Hissəsinin rəis müavini Nəsimi Nəsibov, Gəncə Dövlət Regional Yanğından Mühafizə idarəsinin əməkdaşları, Qızıl Aypara Cəmiyyətin Qazax rayon bölməsinin sədri Qurban Qurbanlı, QAC -nin könüllüləri və mədəniyyət müəssisələrinin əməkdaşları iştirak ediblər. 

Tədbiri giriş sözü ilə Azad Hümbətov açaraq bu günün mahiyyətindən və yaranma tarixindən danışıb, innovativ texnologiyalar mövzusunda məruzə ilə çıxış edib. Məruzə ətrafında çıxış edənlər yarana biləcək hər hansı fövqəladə vəziyyətlə bağlı tədbir iştirakçılarına maarifləndirici məlumatlar, müəssisələrdə təhlükəsizlik qaydalarına əməl olunması barədə təlimatlar veriblər. 

Digər çıxış edənlərdən Qazax- Tovuz Regional Mədəniyyət İdarəsinin Qazax rayonu üzrə nümayəndəsi Valeh Vəliyev, Mədəniyyət Mərkəzinin direktoru Zahidə Həsənova çıxışlarında müəssisələrdə görülən təhlükəsizlik tədbirlərindən, yanğın, zəlzələ və bu kimi fövqəladə vəziyyətlərdə əməkdaşların həyati təhlükəsizliyinin təmin edilməsindən danışıblar. 

Tədbirin ikinci hissəsində Mədəniyyət Mərkəzinin həyətində mədəniyyət müəssisələrinin Mülki Müdafiə Qüvvələrinin toplanışı keçirilib. Tədbir iştirakçıları və qonaqlar Qazax Dövlət Rəsm Qalereyasının 'Fövqəladə hadisələr uşaqların gözü ilə" adlı rəsm sərgisinə,, Qazax rayon MKS-nin təşkil etdiyi mövzuya həsr olunmuş kitab sərgisinə və fövqəladə vəziyyətlərdə lazım olan texniki avadanlıqlara, ilkin tibbi yardım ləvazimatlarına, yanğınsöndürmə üçün lazım olan vasitələrə həsr olunmuş sərgilərə baxış keçiriblər. Sərgidə nümayiş olunan vasitələrdən istifadə qaydası əyani şəkildə tədbir iştirakçılarına izah olunub. 

Sonda şərti olaraq təhlükəli vəziyyətdə qalan şəxsin təhlükədən xilas edilməsi və ona ilkin tibbi yardımın göstərilməsi əyani şəkildə iştirakçılara nümayiş olunub.