02 fevral 2024-cü il tarixində "2 fevral-Azərbaycan Gəncləri Günü" münasibəti ilə Ağstafa rayon Mədəniyyət Mərkəzinin, Ağstafa rayon Mərkəzləşdirilmiş Kitabxana Sisteminin və Ağstafa rayon Heydər Əliyev Mərkəzinin birgə təşkilatçılığı ilə "Mədəniyyətimizdə Gənclik" mövzusunda tədbir keçirilib. Dövlət himnizimin səsləndirilməsi, Ulu öndər Heydər Əliyevin və bütün şəhidlərimizin əziz xatirəsi bir dəqiqəlik sükutla yad edildikdən sonra çıxışçılara söz verilib. Qeyd olunub ki, əsası Ulu Öndər Heydər Əliyev tərəfindən qoyulan dövlət gənclər siyasətinin nəticəsidir ki, bu gün ölkəmizdə idarəetmə bacarığı ilə seçilən intellektual, dünyagörüşlü yeni nəsil yetişib. Tədbirin bədii hissəsində isə istedadlı gənclərin təqdimatında musiqili proqram nümayiş olunub. Sonda Ağstafa rayonunda mədəniyyət sahəsində çalışan bir qrup gənc "2 fevral - Azərbaycan Gəncləri günü münasibəti ilə mədəni-kütləvi tədbirlərdə fəal iştirakına görə" Fəxri Fərmanla təltif olunub.