29 noyabr 2023-cü il tarixdə Qazax rayon MKS-nin E.Hüseynov adına Mərkəzi kitabxanası oxu zalında “Qazax elinin Şəhidləri: Müqəddəs and yerimiz!” adlı videoçarx nümayiş etdirib. Bir qrup tələbə, fəal oxucu və kitabxana əməkdaşlarının iştirak etdiyi tədbirdə Vətən torpaqlarının azadlığı uğrunda qurban gedən Şəhidlərin əziz xatirəsi bir dəqiqəlik sükutla yad edilib. Videoçarxda doğum günləri noyabr ayında olan Abdullayev Sərxan Elxan oğlu, Həmişəyev Qismət Oruc oğlu, Mustafayev Merik Musa oğlu, Qocayev Niftalı Zakir oğlunun qısa və şərəfli ömür yolları əks olunub. Nümayiş zamanı “Azərbaycan bayrağı” ordenli, “Vətən uğrunda”, “Kəlbəcərin azad olunmasına görə” medalları ilə təltif olunmuş hərbçi ailəsində anadan olan, idmançı olmaqla yanaşı, hərbi paltarı çox böyük həvəslə geyinib, şəstlə yeriyərək Türkiyədə keçdiyi “Komando” kursunu 3-cü dərəcəli nəticə ilə başa vuran,Vətən müharibəsi başlayanda intiqam hissi ilə döyüşə atılıb, Kəlbəcər istiqamətində dalbadal dörd postun alınmasında qəhrəmanlıqla vuruşaraq Şəhid olan gizir rütbəli Abdullayev Sərxan Elxan oğlunun; 13 yaşından atasız böyüyən, erkən yaşdan ailənin ömür yükünü çəkən, Qarabağın düşməndən azad olunması uğrunda motoatıcı tağımın komandiri kimi mərdlik, qəhrəmanlıq göstərən,“Vətən uğrunda”, “Döyüşdə fərqlənməyə görə”, “Füzulinin azad olunmasına görə” medalları ilə təltif olunan leytenant Həmişəyev Qismət Oruc oğlunun; Çevik, qorxmaz, mərdliyi ilə daim fərqlənən, təhlükəli əmrləri layiqincə yerinə yetirən Füzuli – Cəbrayıl istiqamətində gedən döyüşlərdə igidliklə vuruşaraq Şəhid olan, “Vətən uğrunda”, “Döyüşdə fərqlənməyə görə”, “Füzulinin azad olunmasına görə” medalları ilə təltif olunmuş Mustafayev Merik Musa oğlunun; evin tək oğlu, yaşıdları arasında qorxmaz, mərd, mübariz kimi tanınan, müharibə zamanı həmişə öndə olan həmlə bölüyünə birinci yazılan, qorxunun üzünə dik baxan, Xocavənddə qızğın döyüş zamanı qəhrəmancasına Şəhid olan, “Vətən uğrunda”, “Füzulinin azad olunmasına görə”, “Xocavəndin azad olunmasına görə”, “Hərbi xidmətlərinə görə” medalları ilə təltif olunan Qocayev Niftalı Zakir oğlunun qısa və şərəfli ömür yolları dərin hüzn və qürur hissi ilə izlənilib. Tədbir iştirakçıları ilə Şəhidlərə həsr olunmuş guşə və Kəlbəcərin azad olunmasına həsr olunmuş kitab sərgisi ətrafında diskussiya keçirilib.