13 dekabr 2023-cü il tarixdə Qazax rayon Mədəniyyət Mərkəzində filiallar ilə birgə Narkomaniyaya qarşı mübarizə tədbirlərinə həsr olunmuş "Narkomaniyaya "Yox" deyək!" adlı tədbir təşkil edilib. 

Tədbiri giriş sözü ilə Mədəniyyət Mərkəzinin direktoru Zahidə Həsənova açıb. O, qeyd edib ki, narkotik maddələr - tələdir! Bu tələyə bir dəfə düşən insanın oradan çıxması çətin olur. Buna görə də narkotiklərdən qorunmağın ən yaxşı yolu ondan heç vaxt istifadə etməməkdir.

Mədəniyyət İşçiləri Həmkarlar İttifaqı Qazax rayon Komitəsinin sədri İsgəndər Qurbanov bildirib ki, narkomaniya millətin sağlam həyat tərzi üçün təhlükə törədir. Narkotik maddələrin qəbul edilməsi ilə insan fiziki və psixoloji cəhətdən məhv olur. Əfsuslar olsun ki, bu gün narkotik aludəçilərin əksəriyyəti gənc nəslin nümayəndələridir. Bunun sonunda dayanan faciəni isə təsəvvür etmək belə qorxuncdur. Çünki gənclər hər bir millətin gələcəyi, dövləti inkişaf etdirən başlıca sütundur.

Digər çıxış edənlər də narkomaniyanın yaratdığı bəlalardan, gənclərin və yeniyetmələrin aldadılaraq bu bəlaya düçar olmalarından, valideynlərin övladlarına qarşı daha diqqətli olmaqlarının vacibliyindən danışıblar.